Flugdagur Flugmálafélags Íslands verður haldinn á Reykjavíkurflugvelli, við Hótel Natura (áður Loftleiðir), laugardaginn 26. maí 2012 milli klukkan 12:00 og 16:00.
- Boðið verður upp á flugsýningu Flugmálafélags Íslands þar sem hægt verður að skoða fjölda flugvéla af öllum stærðum og gerðum.
- Fjölbreytt flugatriði verða svo sem listflug, nákvæmnisflug á þyrlu, flugmódel, svifflugur, svifvængir, í raun flest sem flogið getur.
- Landhelgisgæslan verður með sýningarflug.
- Í tilefni af 75 ára afmæli Icelandair kemur Catalina flugbátur til landsins.
- Aðgangur er ókeypis.
Catalina flugbátar Flugfélags Íslands, Gamli-Pétur, Sæfaxi og Skýfaxi, og Loftleiða, Vestfirðingur og Dynjandi, áttu mikinn þátt í uppbyggingu innanlandsflugs á árunum 1944 til 1961 þegar flugvellir voru fáir, samgöngur á landi erfiðar og sjóferðir tímafrekar.
Síðasti Catalina flugbáturinn í notkun hérlendis var landhelgisflugvélin TF-Rán. Hún var í notkun hérlendis frá 1954 til 1963 og kom hún mjög við sögu í þorskveiðideilum Íslendinga við Breta.
Flugrallý er skemmtileg keppni sem allir flugmenn geta tekið þátt í. Keppendur eru tveggja manna lið, flugmaður og aðstoðarmaður.
Keppnin er skipt í nokkra þætti þar sem reynir á ýmsa þætti flugsins. Í aðalatriðum skiptist keppnin í flugleiðsögu (navigation) og lendingarkeppni.
Flugleiðsagan byggir á því að flugmenn fljúga fyrirfram ákveðna leið samkvæmt flugáætlun sem þeir hafa fengið reiknaða miðað við þann flughraða sem þeir hafa ákveðið.
Gefin eru refsistig ef ekki er flogið yfir beygjupunkta á fyrirfram gefnum tíma. myndir eru af beygjupunktunum og þurfa flugmenn að merkja hvort þær séu af réttum stað. Auk þess hafa flugmenn myndir sem þeir þurfa að staðsetja á flugleiðinni.
Upplýsingar um flugleið og myndir eru afhentar hverju liði fyrir sig 30 mínútum fyrir flugtak hvers liðs.
Reglurnar sem farið er eftir eru alþjóðareglur FAI, alþjóða flugmálafélagsins. Reglurnar eru á vef fai www.fai.org en bein leið að reglunum fyrir 2012 er hér: Air Rally Rules 2012 Refsistigin eru í kafla A4 á blaðsíðu 15 í reglunum.
Til að sjá hvernig hægt er að undirbúa flugið sem best hefur verið tekið saman skjal sem sýnir hvernig Matthías Sveinbjörnsson undirbjó sitt flug í Flugrallý 2008. Þar eru ýmsar leiðbeiningar og hugmyndir sem vert er að skoða og læra af.
Athugið að stigagjöf hefur breyst frá reglunum 2008, þannig að einhverjar tilvísanir í refsistig eru breytt frá því að þetta var skrifað.
Ársþing FMÍ var haldið á Hótel Natura 17. mars s.l. Arngrímur Jóhannsson forseti FMÍ setti þingið og byrjaði á því að segja að þetta væri í síðasta sinn sem hann setur þetta þing þar sem hann sé að stíga til hliðar sem forseti FMÍ.
Valur Stefánsson flutti skýrslu stjórnar og FÍE, Reynir Þór Guðmundsson fór yfir reikninga félagsins, Ágúst Guðmundsson fór yfir skýrslu fisdeildar, Hólmgeir Guðmundsson flutti skýrslu svifflugmanna og Eysteinn Sigursteinsson hélt tölu frá Flugmódelfélaginu Þyt.
Það var greinilegt að viðhaldsmálin hafa tekið mikinn tíma hjá stjórninni og verið fundað stíft um þau málefni með Flugmálastjórn, fulltrúum Innanríkisráðuneytisins, Umhverfis- & Samgöngunefnd og Flugráði. Einnig hafa þeir Valur Stefánsson og Reynir Þór Guðmundsson sótt fundi erlendis þar sem aðallega hefur verið farið yfir viðhaldsmálin. Fanst fulltrúum stjórnar að Flugmálastjóri væri farinn að tala málefnum grasrótarinnar á fundum bæði hérlendis og hjá EASA eins og á nýlegum fundi í Köln.
Þann 5. desember 2011 áttu fulltrúar Flugmálafélags Íslands góðan fund með Flugráði. Vonumst við til þess að Flugráð sjái nú vel þann alvarleika sem grasrótin hefur staðið frammi fyrir frá því svokölluð Part-M reglugerð var innleidd. En eftir þennan ágæta fund þá fór undirritaður að lesa yfir fundargerð Flugráðs frá því í júní (fundargerð nr. 1561) og hnaut þá um kynningu sem flugmálastjóri hélt fyrir Flugráði vegna vinnuhóps sem þá verandi Innanríkisráðherra Kristján Möller skipaði en undirritaður sat fyrir hönd Flugmálafélagsins í þeim hópi. Hér á eftir fer ég yfir skrif flugmálastjóra og einnig tek ég upp punkta úr fundargerðum vinnuhópsins og svar bréfs Utanríkisráðuneytisins.
Vegna tilkynningar frá Flugmálastjórn sem m.a. er á heimasíðu Flugmálastjórnar gerir Svifflugfélagið alvarlegar athugasemdir og leiðréttir rangfærslur stofnunarinnar.
Varðandi mál Svifflugfélagsins þá er kolröng sú fullyrðing Flugmálastjórnar að í áratugi hafi verið skylt að nota aðeins vottaða hluti í loftför. Sú regla tók gildi þann 28. sept. 2009 og á aðeins við um svokölluð EASA loftför. Þessi regla um vottaða varahluti á ekki heldur við um eldri flugvélar, heimasmíði eða fis en þessir flokkar loftfara eru vel yfir helmingur flugflotans.
Þá mótmælir Svifflugfélagið fullyrðingu Flugmálastjórnar að ekki hafi verið til staðar gögn sem sýna fram á að notaðar séu viðurkenndar aðferðir við breytingar og viðhald á svifflugum Svifflugfélagins. Þessi fullyrðing er röng, öll gögn eru til staðar og voru til staðar við úttekt.
Vakin er athygli á að reglurnar tóku að fullu gildi 28. sept. 2009. Á síðasta ári sá Flugmálastjórn Íslands um að votta ástand loftfara og gerði úttekt á m.a hinu tiltekna loftfari og skrifaði það út. Þá sá Flugmálastjórn enga ástæðu að gera athugasemdir við verklagið en skyndilega nú eru sömu atriði sem Flugmálastjórn skrifaði upp á grándunaratriði. Líklega má gránda allar flugvélar af sömu ástæðu. Gagnrýni Flugmálastjórnar á við þá sjálfa.
Skýrar Evópureglur heimila að fast tengt GPS tæki sé um borð í okkar flokki loftfara. Flugmálastjórn hafnar þeim reglum og segir kyrrsetningarsök að hafa tækið um borð. Þess var krafist að GPS festingar ásamt rafleiðslum verði fjarlægðar svo stofnunin gæti heimilað eitt stutt einstakt ferjuflug.
